EKIN, ELKARREKIN

Doinua: Goizean altxatu eta

1

Udazkena, igandea

hegoko haize epela

Bizarainen gora goaz

gure oinetan orbela

bazterrera begiratu

han onddo baten txapela

begiztatu du alabak

eta ez denez tentela

itaundu dit: -Aita, nola

dakizu txarra ez dela?

– Aurrekoengandik ikasi

nuen nik, nola bestela? (Bis)

Ikastolatik kanpora

ere bada ikasgela.

2 –

Bordaxar, Eguzki-Borda

behi, ardi, laborantza

gazte ausartek badute

lur hauetan esperantza.

-Aita, hau ere Altza al da?

Semeak duen zalantza

askotan aipatu diot

hemen dela mugen dantza.

Alabak beste galdera

jakin mina dute antza:

-Nola dakizu non hasten

eta bukatzen den Altza? (Bis)

-Aurrekoei entzutea,

sekretuak hortan datza.

3 –

Birigarro, zapelaitza,

oilagor, zozo, enara,…

sardea, sega, aitzurra,…

iel, arkara, susara,…

Marrus, Lardi, Estibaus,

Eguzkitza, Arriaga,…

hitzok iritsi al ziren

zuen belarrietara?

Handiegia ez al da

galeraren abiada?

bide hau jarraituz nora

iritsiko ote gara? (Bis)

Pentsatze hutsak eman dit

sekulako hotzikara.

4 –

Aita, ikasi zenuen

aitona-amonei entzuten

eta egiten zutena

begi zabalik ikusten

bertso zahar ta berriak

maiz abesten zizkizuten

arin-arin, fandangoak

plazan dantzatzen zituzten,

baina dena bazterrean

zuek joan zarete uzten.

Nola ikasiko dugu

inork ez badu erakusten? (Bis)

Zer izango zen aurrekoek

berdin jokatu bazuten?

5 –

Gauzak honela aukera

bat dugu borrokatzea

disgustu ta lan handien

zurrunbiloan sartzea

bigarren aukera berriz

dugunaz konformatzea

haria eteten utzi

eta etsia hartzea

jaso dugun ondarea

hurrenei ez pasatzea

herri jakintza zaharra

behin betirako galtzea (Bis)

gure esku dago horren

konplize bilakatzea.

6 –

Dena aldatu daiteke

estrategi on batekin

etorkizuna eraiki

gaurko ahaleginarekin

euskara ta historia

bultza hainbat ekintzekin

gazteek jakin dezaten

non dauden eta norekin.

Ez al zen argi geratu

hau dena korrikarekin?

Ekiteko garai da

ea bada, Altza ekin! (Bis)

ekin eta, berriz, ekin

Altzatarrok elkarrekin.